...दूर दूर !
मी इथे तुझ्यात चूर...दूर दूर !
तू इथून दूर दूर...दूर दूर !
मेघ दाटले मनातल्या मनात...
नाचतो कुठे मयूर...दूर दूर ?
लागलीच भांडणे परस्परांत...
काढला कुणी कुसूर...दूर दूर ?
जा विचार...आग लागली कशास...?
चालला निघून धूर...दूर दूर !
नेमका न आणते तुझा सुगंध...
ही हवा तुला फितूर... दूर दूर !
एकटाच मी तमात, एकटाच...
चांदण्यात तू टिपूर...दूर दूर !
स्वप्नधुंद, सप्तरंगल्या जगात...
जायचे मला जरूर...दूर दूर !
पोचवू कसा तुझ्या मनात शुष्क...
काळजामधील पूर...दूर दूर !
का इथेच कोळशांत शोधतोस...?
सापडेल कोहिनूर...दूर दूर !
सांजवेळ ही रिती रिती उदास...
आणि आर्त, खिन्न सूर...दूर दूर !
- प्रदीप कुलकर्णी
No comments:
Post a Comment